(( على فكرة ))

السلام عليكم ورحمة الله وبركاته
قصيدة على فكرة للشاعر الإماراتي المبدع
طــارق المحيــاس ( إحساس قلب )
يقول :

كثر ما تقدر تمادى وقول اللي تبي وبساع
أنا واثق ولا يهمني إذا تحفر لي أي حفرة
ترا من يوصل القمة يحسده من سكن بالقاع
وهالشي من قبل معروف يعني بس على فكرة
مثل مافي تجارة و خير بعد في للطرق قطاع
مادم القافلة تمشي ناح الكلب ما ضره
ومثل مافي ضعاف نفوس مثلك يحسدون شجاع
تأكد والله ماحركت في الشجعان لو شعرة
ترانا تربية زايد لنا عـــدة وعتــــاد وســــــاع
في وقت الشدة ما نرحم يا ويل اللي بدى غدره
وتراها المسألة ماهي بقضية جوع أو إشباع
تفضل عندنا في البيت وشوف شكبرها السفرة
نحن لو تدري نشبع بطن فاضي اذا انه جاع
ونفهم مقصد المحتاج قبل لا يقول من نظرة
أنا أكتب أحاسيسي شعر لا تظن أنا خداع
عرفت أني أنا شاعر كذا والله بالفطرة
أنا ما أصطنع شعري ولا أصارع عليه صراع
لقيت الشي ذا فيني وقلبي حبة من صغره
أخذ من وقتي كل وقتي وبين الناس شعري شاع
واذا اني قلته باحساسي أخذ من صوتي كل نبرة
أنا أداوي بأشعاري هموم الناس و الأوجاع
ولا أبغي من ورا شعري مقابل أو أبي شهرة
المقابل خله لك انته وأنا خلي الشعر فواع
لانها نظرتي بعيدة ولا أظن أنته لك نظرة
أنا أصدق دوم مع نفسي وبالتالي الشعر ينصاع
تحت أمري تحت شوري على كيفي أنا أسيره
بغيت أمدح ترا بمدح بغيت الذم مرحبا الساع
أهو شعري وأنا كيفي مثل ما أبيغه بعتبره
أنا شعري مثل نجم تلالا بالسما لماع
واللي مثلك يشوفه فوق يطلع وقتها عذره
ولاأظن له عذر أصلا لأنه بس يقول امباع
وأنا ما أسمعه والله كفاني خيره وشره
أنا الاشعار تخضع لي مذله وبالغصب اخضاع
ثقة كيفك تسميها واللا سمها بطرة
أنا شعري ترا يخشاه ناس يهزمون ضباع
وشعرك أنت مثلك يوم تشك الخيط بالابرة
تحاول تكتبه يرفض يعاند يرتبك يلتاع
وأنا أتحداك لو تقدر تقوله بس على عشره
ياخويه لو تكون انته شبر صدقني شعري باع
وأنا كم مرة أسأل عنك يوقولون والله والعثرة
تقيمني ومن حظرتك أسير الشوق أو الملتاع
لا والله تخسي أنته ومن فوقك بعد عشرة
أونك فاكر أنك انت على غفلة مثل فزاع
لا والله ولا تسوى شعر فزاع أو ظفره
ياخويه هذا شاعر فارس مثقف وصيته ذاع
تصفق له جميع الناس من الروعة اللي في شعره
تحت أمره هبوط هبوط وحالا لو يقول قلاع
والله من كثر حبه حفظنا كل ابو شعره
اهو بحر الشعر أصلا وأنا رافع في بحره شراع
كلام الحق ما يزعل ولا يذبل أبد زهرة
يروض كل خيول الأرض وكل خيل لأمره طاع
وأبيك تشوف شيسوي بسباق الخيل والقدرة
اذا انك ناوي تتفلسف تراها الفلسفة أنواع
وأسهلها معك صعبة و ليه بس تدعي القدرة
لا تتفلسف بكلماتك ترا مالك أبد أي ذاع
ترا سهلة أقلك قم أطلع لو سمحت برا
ولكنا تربينا وفينا المستحى ماطاع
تعلمنا مع الأيام نعطي كل أحد قدرة
ومب كل من كتب له بيت ويمكن هو شراه أو باع
يسمي نفسه الشاعر ويستطرب على ذكره
ترا الشاعر عبارة عن مشاعر داخل الأضلاع
أذا طلعت من الخاطر بتوصل كوكب الزهرة
أنا وش لي أرد أصلا على واحد لبس له قناع
دفعه النقص يتكلم وهو ميت من الحرة
بقول لك بس شي واحد ترا قالوه بالاجماع
ومن قاله ترا قاله قناعة تجربة وخبره
ترا من يوصل القمة يحسدة من سكن بالقاع
وهالشي من قبل معروف يعني بس على فكرة


لسماع القصيدة بصوت الشاعر :
http://www.6rbtop.com/listen.php?son...3&type=au&q=hi

مشكوووووووووووووووووووورة