الـشـاطــر حـسـن

اول شي سلام عليكم
انيحابه اقدم لكم هالمشاركه المتواضعه جدا جدا وهي عباره عن قصه من الخيال
بنضور تراثي جميل في نضري واتمنى ان يكون في عيونكم بعد.
أخليكم مع .....


الشاطر حسن
كان يا ما كان,على النبي وآله أفضل الصلاة والسلام.
كان فيه ملك عنده ولد أسمه حسن, وكان هالولد وحيد امه وابوه وماعنده اغلى واعز منه .
كبر حسن وصار شاب قوي والملك بعد كبر في السن, حتى مرض ومات.
وفي يوم من الأيام مسك الشاطر حسن أمه وقال لها: وش رايش يالوالده نطلع نغير جو .
وافقت الأم وركبت فرسها وركب الشاطر حسن فرسه وطلعو, ومشو ومشو ومشو , وفي طريقهم شافو رجال واقف عند مفترق ثلاث طرق.
قال الشاطر حسن: سلام عليكم
رد عليه الرجال : وعليكم السلام
قال الشاطر حسن : هالطريق وين تودي؟
قال له الرجال : ياولدي هدا طريق السلامه , وهدا طريق الندامه , وهدا طريق الي يودي ومايجيب.
قام لك الشاطر حسن ومسوي حاله شجاع ومايخاف وقال : انا ابغي الطريق الي يودي ومايجيب...
قال له الرجال : صل على نبيك , يمين ,يسار ......مافيه الولد معزم وراكبنه مليون جني الا بيروح هالطريق.
قال له الرجال ترى بتموت .
قال الشاطر حسن : انا بروح والا فيها فيها الواحد كم مره بيموت والموته موته وحده.
مشى الحبيب في الطريق وماله من الشيطان طريق ومشى ومشى ...... الا بمارد كبيييييييير اريوله في الارض وراسه السما.
قال له الشاطر حسن : سلام عليكم .
قال له المارد : ومن الا قال لك تمر من هالصوب ....
قال الشاطر حسن: بعبر من هالطريق .
رد عله المارد ماتعبر الا( بالحرب)
بعد والشاطر حسن يبغى الحجه طلع سيفه وبلمح البصر قص ارايله ثنتينهم .
طاح المارد وقال ماعمره أحد غلبني وعلى آخر عمري تجي انت و تقص اريولي .
المهم قام المارد وعطا الشاطر حسن مفاتيح القصر حقه وقال له : هادي مفاتيح القصر واقعد فيه انت وامك وانا خادم عندكم .
وبما انا الشاطر حسن ابوه ملك فأكيد اهوه ملك وتعرفون الملوك كل يوم صيد وقناص ....وهالخرابيط ومخلين القرعى ترعى.
وفي يوم من الأيام طلع الشاطر حسن يشم هوا..
حنت أمه على المارد وجابت الشاش والقطن وقامت تغسل وتنظف ريوله باليود .
وعلى هالسالفه كل يوم , لين حبو بعض وتزوجو , والشاطر حسن مايدري بالطبخه.
حملت الأم , جابت الولد الأول , وجابت الولد الثاني .
قالت الأم للمارد : ألحين ادا درى الشاطر حسن بيسود عيشتنا انا وياك ياغناتي , وش الحل ؟
فكر فكر المارد وقال الها تعالي عند الدريشه وقال الها تشوفين داك النخل كله رمان , بس ماعمره أحد دخل هالنخل وطلع سالم , بس المشكله كيف نخليه يدخل هالنخل...
قالت الأم : بسيطه , جابت هالكركم وصبغت وجها .
جا الشاطر حسن وشاف امه وقال : ها الوالده سلامات وش فيش ؟
قالت الام :ابد ياولدي بس قبل ماأموت نفسي آكل رمانه من داك النخل ..
وكالعاده الشاطر حسن دق على صدره وقال : (مايمبى ليها).
ركب فرسه وانطلق زي البرق , وصل للنخل الا عيوز مطقطق قاعد على الباب.
قال الشاطر حسن : سلام عليكم .
قال له العيوز: لو لا سلامك سبق كلامك كان عجنتك وهرست عضامك , وين رايح يالحبيب ؟
قال الشاطر حسن : ابد والله بس بقبع لي رمانه حق الوالده .
قال له العيوز : انا صار لي اربعين سنه قاعد اهنيه ونفسي في نتفت رمانه ماحصلت وانت جاي لي لا لك ولا عليك تبغي رمانه ..لكن شوف انا بخليك تدخل بس انته واسمعني عدل ..
تدخل وترووح سيده ولا تطالع لا يمين ولا يسار وتقبع الا تبغاه وتحطه في مخباك وتطلع .. فاهم .
وان طالع يمين أو يسار بتتقطع نتفه نتفه وبتموت .
ودخل الشاطر حسن



والمره الجايه اكمل لكم باقي القصه ادا كانت عاجبتكم ..... سلملم .

اختي بسرعة كملي القصة صدق انها مشوووقة

تحياتي

مشكوووووووووووورة ..