" المباني "

موضوع: " المباني " 24/04/08, 06:20 pm

قصيدة المباني للشاعر
" حـــامد زيــــــــد "

جابك الله من غياب ضيق صدور المباني .. قبل لا الوحشة تزعزع بيتك الصلب وتبيده
بيتك اللي من رحلت وكل جدرانه تعاني .. ما تحمل ينتظر شهرين وعيونك بعيده
الله العالم لو انك جيت متأخر ثواني .. ما تشوف الا بقايا من حصاه ومن حديده
من عرفتك وانت تايه من مواني لي مواني .. وتارك قلبي يولع من وقيده في وقيده
ضاعت سنيني أحد بهالليالي واتحداني .. وانت ما تشبع غياب ولا تخاف من النقيده
ودي أتحمد لك الله بالسلامة ما مداني .. كل ما توصل برحلة ترجع برحلة جديده
دام تدري كل وجه غير وجه الله فاني .. ياخي اكسب لك ثواب وخاف ربك في عبيده
كان فيني عيب قلي .. فيني العيب الفلاني .. كان هرجي مزعلك في شي قلي لا تعيده
عيب تصغر في عيوني وانت برقاب الغواني .. ليه تستسهل طعوني وانت خابرني وليده
لعنبوك ان مت بيدك وش يفكك من أخواني .. لا احزنوا ربي على فرقاي وش اللي تستفيده
انت منت اللي عشقته انت أكيد انسان ثاني .. ليه صرت بهالبرود وهالأحاسيس البليده
وين حبك للزعل ؟.. وين العناد الأولاني ؟.. وين حنية زمان وفرحة العمر الرغيده
وين ذاك اللي اليا أقبل ما يبات الا بأماني .. وين راح اللي ليا قفا مايروح الا فقيده
واحد جابه الله بس يامر ويعصاني .. الوحيد اللي أخافه غصب وأمشي معاه سيده
ما بغيت أطيح بيده لين ماربي بلاني .. والا أنا لو هي بكيفي ما بغيت أطيح بيده
ذاك بس اللي ليا من جيته يلخبط كياني .. اللي بنظرة ينشف دم قلبي في وريده
قبل أشوفه أجمع له أحلى القصايد والمعاني .. وان لقيته ما عرفت أقول لي جملة مفيده
ألف مرة قبله أعد القصيدة من لساني .. ولعنبوه ان جيت عنده قمت أخربط بالقصيده
أمدحه وأنا أدري انه لو تباطاني نساني .. أنطحه وأنا أعرفه مجنون وأفكاره عنيده
من يسوي بي سواتك يالرهيف الأسمراني .. منهو من الناس غيرك غلطته ترفع رصيده
من يقص جناح طيرك وانت أعز انسان جاني .. ليه أخاف رماح غيرك وانت ضرباتك شديده
وان تبعتك أتبعك من طيبي وواسع بطاني .. والا أنا لا جيت أكيد انسان عز الله بكيده
أقدر أنزع لك ثيابي وألبس ثياب الأناني .. وأقدر أطلع من عذابي وألعب بدورك وأجيده
ومستعد أكسب رهاني لو بغيت أكسب رهاني .. وأخدعك باحساس كاذب وأتحدى من يصيده
ابك أنا لا شفت خلي حط غيري في مكاني .. والله أني لأتركه وأن صد لأعشق سيد سيده
جيت مابيك تحقرني جيت أبيك تعز شاني .. جيت أبي فزعة ضلوعك من مشاعرك البليده
خلني داخل حدودك واجبر بخاطر زماني .. اكذب فياقي وعودك واصدق بلحظة سعيده
انتشلني من برودك لو تولع بالمحاني .. عطني احساس بوجودك واخذ كل اللي تريده
تكفى واليا قلت تكفى بيع خلق الله عشاني .. لا تضيع من يديني فرصة العمر الوحيده
يعلم الله شفت منك ومن غيابك ما كفاني .. كان ما تقدر تخفف هم قلبي لا تزيده
شف غيابك وش يسوي بالصدور وبالمباني .. وانت تدري كيف كانت صدمة غيابك شديده
والله انك لو وصلت البيت متأخر ثواني .. ماتشوف الا بقايا من حصاه ومن حديده

موضوع: رد: " المباني " 29/04/08, 03:33 pm

مشكوووووووووووووووووووورة ..

موضوع: رد: " المباني " 29/04/08, 04:46 pm

العفو
شكرا على المروور

موضوع: رد: " المباني " 30/04/08, 12:27 pm

شكرااا

موضوع: رد: " المباني " 30/04/08, 06:35 pm

العفوو
شكرا على المروور